ગુજ્જુભાઈ ખરેખર 'ગ્રેટ' છે...!! ગમે એવી ગુજરાતી ફિલ્મ

             ગુજ્જુભાઈ સિરિઝના નાટકો જોયેલા... હવે ગુજ્જુભાઈ એટલે કે, સિદ્ધાર્થ રાંદેરિયા 'ગુજ્જુભાઈ ધ ગ્રેટ' ફિલ્મ લઈને આવતા હોય એટલે હસાવશે એવી અપેક્ષા તો તેમના નાટકના જોનારને હોય હોય ને હોય જ.  હા, ફિલ્મ જોતા પહેલા એવું હતુ કે, ફિલ્મ નાટક  ન હોય તો સારું.. ને જેવી ફિલ્મ પતી કે તરત થયું કે, ના.. નાટક નહોતું જ, પરદા પર ફિલ્મ જ દેખાતી હતી. જો કે, એ માટેની ક્રેડિટ ડિરેક્ટર ઈશાનના ખાતામાં જાય. ફિલ્મની જે પંચ લાઈન છે તેમ 1ST સુપર કોમેડી ગુજરાતી ફિલ્મ.. દેખાઈ રહી છે. 

સ્ટોરી અને સ્ક્રીનપ્લે

એન્જોય... એન્જોય.... અને એન્જોય.... આવો જીવનમંત્ર રાખનારા હસમુખ ગાંધીની ફેમિલિ ફરતે આખી ફિલ્મની કહાણી છે. એ કહાણીમાં દિકરી તનિષા, તનિષાનો બોયફ્રેન્ડ મોન્ટુ અને હસમુખ ગાંધીનો મેનેજર બકુલ બુચ કઈ રીતે ટ્વીસ્ટ લાવે છે એ ઘટમાળ માત્ર ને માત્ર હાસ્ય સર્જે છે. અધૂરામાં પૂરુ તેમાં પોલીસ અને આતંકવાદી ભળે એટલે કહાણી જામતી જાય છે. સિદ્ધાર્થ રાંદેરિયાનો સ્ક્રીનપ્લે એટલે હાસ્યની ગેરંટી તો હોય જ.

અભિનય

સિદ્ધાર્થ રાંદેરિયા ધમાલ મચાવે જ.. પણ એમની ધમાલ જેટલી જ કમાલ કરી જિમિત ત્રિવેદીએ. સિદ્ધાર્થ રાંદેરિયા સાથે સ્ક્રીન શેર કરવી એટલે તગડા એક્ટર હોવું અનિવાર્ય અને આવશ્યક બંને હતુ, ને જિમિતને જોઈ દર્શકો ચોક્કસ એમ બોલે છે કે, હસમુખભાઈને બકુલ બરાબરનો મળ્યો છે.!! સ્વાતિ શાહ તો મજ્જાના એક્ટ્રેસ છ જ.  સુનિલ વિસરાણી અને ધર્મેશ વ્યાસ પણ પોલીસ અને આતંકવાદીના કિરદારમાં જમાવટ કરે છે. 

ગીત સંગીત

નિરેન ભટ્ટ અને ઈશાન રાંદેરિયાના ગીતોને પાર્થ ભરત ઠક્કર અને અદ્વેત નેમલેકરે સંગીત આપ્યુ છે. ગીત યંગસ્ટર્સને પસંદ આવે એવી ફ્લેવરના સંભળાય છે.

દિગ્દર્શન

ફિલ્મ જે રીતે સ્ટાર્ટ થાય છે. એ જ સીકવન્સ બતાવી દે છે કે ઈશાનની ગાડી દોડવાની છે બોસ. પહેલી જ ફિલ્મ ને એમાં સિદ્ધાર્થ રાંદેરિયા ( ભલે ને પિતા હોય ) સામે ડિરેક્શન તરીકે એન્ટ્રી લેવાની અઘરું તો ગણાય જ. ને એમાં આઉટ એન્ડ આઉટ કોમેડી સબ્જેક્ટ એટલે દિગ્દર્શક તરીકે ઈશાને અઘરી પરીક્ષા પાસ કરવાની હતી.. જે ઈશાને કરી છે.

ફિલ્મ શા માટે જોવા જવી ? 

જો તમે સરસ મજાની ગુજરાતી ફિલ્મ જોવા માગતા હોય તો ડેફિનેટલી તમારે આ ફિલ્મ જોવી જોઈએ. 

કોણ ન જોવા જાય ?

જેને ગુજરાતી ફિલ્મ માટે સોગિયું ડાચું જ રાખવાનું છે અને ફિલ્મની નિંદા જ કરવાની છે એ મહેરબાની કરીને જોવા ન જાય... કેમ કે, જો એ જોવા જશે તો એને પણ હસાવી દેશે આ કોમેડી ફિલ્મ...

  

દેશની કોઈ સરહદ પ્રેમને રોકી શકતી નથી : દર્શકો ધારે તો કમાણીને કોઈ રોકી શકતા નથી.

ગુજરાતી ફિલ્મ પહેલા ત્રણ દિવસમાં કમાણી 65 લાખને પાર પહોંચાડે અને અઠવાડિયુ પતે ત્યાં સુધીમાં કલેક્શનનો આંંક કરોડને પાર કરી જાય તો એ ગુજરાતી ફિલ્મ ઈન્ડસ્ટ્રી માટે ગુડ ન્યૂઝ જ કહેવાય. ને વળી, અર્બન અર્બન અર્બનના દેકારા વચ્ચે આ ફિલ્મ આવી અને કલેક્શનના આંકડાઓ દ્વારા એ બતાવી ગઈ કે રૂરલ વિષય પરની ગુજરાતી ફિલ્મ પણ થિયેટરમાં ચાલે જ છે. નવાઈની વાત તો એ છે કે, આ ફિલ્મ આવી ત્યારે તેર વર્ષ બાદ ફિલ્મની ટિકિટ બ્લેકમાં વેચાઈ તેવો કેસ નોંધાયો. જો કે, આ તો કાળાબજારિયાઓ પોલીસની ઝપટે ચડી ગયા હશે એટલે કેસ થયો બાકી વિક્રમની ફિલ્મની ટિકિટ બ્લેકમાં વેચાતી હોવાની બાબત તેના ચાહકો માટે નવી નથી.  હા, માત્ર અર્બનના ટેગ વાળી જ ફિલ્મ જોવાનું વિચારનાર ગુજરાતીઓને આ બાબત ચોક્કસ નવાઈ પમાડે. 

કેવી છે ફિલ્મ ?

આમ જુઓ તો મોટેભાગે જે ગુજરાતી ફિલ્મ્સ બોક્સઓફિસ ચલાવી રહી છે તેના જેવી જ ફિલ્મ ગણી શકાય. એકદમ જોરદાર ને એકદમ નવું જ જોવા મળે એવો ન તો કોઈ દાવો કરાયો કે ન તો એવું તમને જોવા મળે. અરે ક્યાંક ક્યાંક તમને સ્ક્રીન પ્લે નબળો લાગે.. પણ હા.. ફિલ્મની એક્શન અને સિનેમેટ્રોગ્રાફીમાં કરાયેલી મહેનત તમને ચોક્કસ દેખાઈ આવે. વિક્રમના અભિનયની ચર્ચા તેની અગાઉની ફિલ્મની સરખામણીએ જ કરવી પડે ને એમાં દર ફિલ્મે સુધારો દેખાતો જાય.. તો પહેલી જ ફિલ્મ સાથે તનુશ્રીનું કામ નોંધનીય છે. વિલનમાં ચંદન રાઠોડ જામે છે બોસ. હું તો માનું કે, ચંદન ગુજરાતી ફિલ્મ્સ માટે સારો વિલન સાબિત થઈ શકે તેમ છે. જો આમ થાય તો ફિલ્મના તકિયા કલામની જેમ એ ચોક્કસ બોલશે કે, સુભાનઅલ્લાહ. હિના રાજપૂત પણ પોતાના કિરદારને ન્યાય આપે છે. પણ હા સાથે એ થોડુંક ખૂંચે કે, મુખ્ય કલાકારોને બાદ કરતા અન્ય કલાકારોની અણઆવડત પરદા પર નરી આંખે દેખાઈ આવે છે, એ પછી વિક્રમના મિત્રોના કિરદારમાં રહેલા કલાકારો હોય કે ચંદનના મિત્રના મહત્વના કિરદારમાં રહેલ કલાકાર હોય. એ તમામની એન્ટ્રી વખતે સ્ક્રીનની ગતિ ચોક્કસ અવરોધાતી દેખાય. જો કે, એ નબળા પાસા પર હરેશ પટેલની એક્શન ચોક્કસ હાવી થઈ જાય. આમ પણ આ ફિલ્મ પોતાના પિતાશ્રીના સ્વપ્ન સમાન હોઈ હરેશ પટેલે ફિલ્મની સફળતા સાથે પિતાને અંજલિ આપી છે. ગુજરાતી સિનેમાના ભિષ્મ પિતામહનું જેને બિરુદ મળ્યુ હતુ એવા ગોવિંદભાઈ પટેલને ફિલ્મની સફળતાના રિપોર્ટ થકી જ હરેશ પટેલે ખરી શ્રદ્ધાંજલિ પાઠવી છે. 

ગુજરાતી ફિલ્મ્સના 'અચ્છે દિન' ક્યારે ?

ગુજરાતી ફિલ્મ્સમાં'ય હતો દમ

આપણી ફિલ્મ્સ કોઈથી નહોતી કમ

કદાચ એટલે જ હીન્દી સિનેમામાં મોટું નામ ધરાવતા અદાકારો ગુજરાતી ફિલ્મ્સમાં કામ કરતા હતા.  

જરાં યાદ કરો... ગુજરાતી ફિલ્મનો સુવર્ણ કાળ... 

ગુજરાતી ફિલ્મ્સના 'અચ્છે દિન' ક્યારે ?

જ્યુબિલી કુમાર ઉર્ફે રાજેન્દ્ર કુમાર, અમઝદ ખાન, શત્રુઘ્નસિંહા, ડેની, નસીરુદ્દીન શાહ, શક્તિ કપુર, ગુલશન ગ્રોવર, ઓમપુરી, સદાશિવ અમરાપુરકર, ગોવિંદ નામદેવ, અપૂર્વ અગ્નિહોત્રી, તનુજા, રીનારોય, માધુરી દીક્ષિત, સ્મિતા પાટીલ... સહિત... કેટ-કેટલાય ચહેરાઓ ગુજરાતી ફિલ્મના પરદે દેખાઈ ચૂક્યા છે. બોસ, એ વખતની આપણી ફિલ્મ્સમાં કંઈક તો દમ હશે ને યાર... કંઈ એમ જ ઓછા આ ચહેરાઓ આપણી ફિલ્મમાં દેખાવાનું પસંદ કરે  ? દલીલ જ કરવી છે તે લોકો તો એમ પણ કહેશે કે, એ સમયે તેમની પાસે વધારે કામ નહી હોય એટલે તેમણે કામના ભાગ રૂપે આપણી ફિલ્મ્સ સ્વીકારી હશે.. આવી દલીલ કરનારાઓ સાથે શબ્દથી સંઘર્ષ કરવા કરતા તેઓ વધુ એક વખત ઉપરના નામ વાંચી લે અને તેમણે જે સાલમાં ગુજરાતી ફિલ્મમાં કામ કર્યુ એ જ વર્ષે તેમણે કરેલી હિન્દી ફિલ્મની યાદી મારી પાસેથી મેળવી શકે છે. કોઈએ કંઈ એમ જ ગુજરાતી ફિલ્મમાં કામ નહોતું કર્યુ. પણ એ ફિલ્મની સ્ટોરી અને એ વખતની મર્યાદાઓમાં થઈ શકે તેવું મેકિંગ જોવા મળતું હતુ. ચાલશે... જેવી વિચારસરણી તો ઘણી પાછળથી આવી. બાકી એ વખતની સુપરહિટ ફિલ્મને આજે પણ જુઓ તો તમને તેનું  મેકિંગ  ચોક્કસ ગમશે જ. 

ગુજરાતી ફિલ્મો નહી જોનારાઓના મનમાં એવી પણ દલીલ હોય છે કે, માત્ર કેડીયુ-ધોતી અને ચણિયાચોળી વાળી જ ગુજરાતી ફિલ્મ હોય છે. પણ યાર.. આ માનસિકતાને જડતાથી વળગી રહેવાની જગ્યાએ એય યાદ કરોને કે એક આખેઆખો ગાળો એવો ગયો.. જેમાં એવી જ ફિલ્મ આવી.. કે જેમાં તમને જે લૂક જુઓ ગમે છે એ જ લૂક સાથે ફિલ્મ્સ બની.

ધીરે ધીરે લોકકથાનક વાળી ફિલ્મ વધતી ગઈ... જ્યાં સુધી એ કથાનક ગમ્યા ત્યાં સુધી દર્શકોએ જોઈ ફિલ્મ.. ને વખાણી. પણ પછી પરિવર્તન તો જોઈએ ને... આપણા મેકર્સ તો ઘેટાંચાલની જેમ ચાલ્યા જ ગયા... પછી દર્શકોએ થિયેટર તરફ ચાલવાનું બંધ કર્યુ.  

હવે ફરી... સારી આશા બંધાઈ છે. 

સારા મેકર્સ સામે આવી રહ્યા છે. 

નવલોહિયા મથી રહ્યા છે. 

સંદીપ પટેલની મોતીના ચોક રે સપનામાં દીઠા હોય કે નવા પ્રયોગ સાથેની લવ ઈઝ બ્લાઈન્ડ, જનમોજનમ, આશિષ કક્કડની બેટરહાફ, નૈતિક રાવલ અને ખંજનની ચાર, મૌલિક પાઠકની વીર હમીરજી, વિપુલ વ્યાસની પરદેશ- એક સપનું, ધવલ પટેલે બનાવેલી ફિલ્મ વ્હીસ્કી ઈઝ રિસ્કી, ઓસ્કરના નોમિનેશનમાંથી ફેંકાયેલી ફિલ્મ ધ ગુડ રોડ, આ વર્ષે જ આવેલી ફિલ્મ, હેપ્પી ફેમિલી પ્રા. લિ, આપણે તો ધીરુભાઈ, આ તે કેવી દુનિયાથી માંડી અભિષેક જૈનની કેવી રીતે જઈશ અને બે યાર... સહિતની ફિલ્મની સફર હવે સારી ફિલ્મની અને ફિલ્મ જગતના 'અચ્છે દિન'ની આશા જગાવે છે. પણ હા.. સારી લોકકથાનક વાળી ફિલ્મની સાથે જેમ ગમે તે લોકકથાની ફિલ્મ.. ગમે તેવા મેકિંગ સાથે દર્શકોની માથે ઝીંકી દેવાઈ. એવી જ રીતે 'અર્બન ગુજરાતી ફિલ્મ'ના નામે પણ દર્શકોની બેન્ડ બજાવાય છે, એ બંધ થાય તો સારુ. કારણ કે, સારી ફિલ્મ હશે વિચારીને થિયેટરમાં ગયા પછી  જે દર્શકોનો દાવ થઈ જાય છે એ ફરી બીજા સારા પ્રયત્ન વખતે થિયેટરથી દુર રહેવાનું જ વિચારશે.. ને એને સવાલ થશે,  ગુજરાતી ફિલ્મ્સના 'અચ્છે દિન' ક્યારે ?

ત્રણ ફિલ્મ પર છે સંજય મૌર્યને આશા

સાચી પ્રીત કરનારા દુનિયાથી ડરતા નથી

ઉમેશ બારોટ અને ત્રિશલાની પહેલી ફિલ્મ... 

અર્બન ગુજરાતી ફિલ્મના ટ્રેન્ડ પર હિતેન કુમારના પ્રહાર

ગુજરાતી ફિલ્મ જગત હાલ અર્બન અને રૂરલ એમ બે ભાગમાં વહેચાઈ ગયું છે ત્યારે હિતેન કુમારે આપેલા એક ઈન્ટરવ્યુમાં તેમણે અર્બન અને રૂરલ ફિલ્મોના ભાગલા અંગે પ્રહાર કર્યા હતા.
જુઓ ટીવીનાઈન સંવાદદાતા દિનેશ સિંધવે હિતેન કુમારની લીધેલી ખાસ મુલાકાત.

હિતેન કુમારના ચાહકોએ તેમજ ગુજરાતી ફિલ્મ ઈન્ડસ્ટ્રી સાથે જોડાયેલા લોકોએ અચૂક જોવા જેવી મુલાકાત.

કનોડિયા ફેમિલીમાં ખુશીના સમાચાર : મોના બનવાની છે મમ્મી..

બોક્સઓફિસની દુનિયામાં નવી ફિલ્મ... આ તે કેવી દુનિયા !

આ તે કેવી દુનિયા
આ ફિલ્મનું પોસ્ટર જોયું ત્યારે જ હતું કે અર્બન મૂવી જોવાનું પસંદ કરનારાઓ પોસ્ટર જોઈને પણ એકવાર ચોક્કસ થિયેટર સુધી પહોંચશે.  ફિલ્મના કલેક્શનને લઈને અમુક મિત્રો સાથે થયેલી વાત પ્રમાણે, આ સાચુ પણ પડ્યું. અમુક સેન્ટરને બાદ કરતા અમદાવાદ, મુંબઈ, વડોદરા, ભાવનગર, રાજકોટ સહિત અન્ય સેન્ટરમાં  ફિલ્મને સારો રિસ્પોન્સ મળ્યો એ ફિલ્મ મેકર્સ માટે પુણ્યના પોઈન્ટ વધારનારી વાત છે. ( પુણ્યના પોઈન્ટ.. શબ્દપ્રયોગ ફિલ્મ જેણે જોઈ નથી તેને નહી સમજાય ! ) 

સ્ટોરી
ફિલ્મની વન લાઈન ખુબ જ સરસ છે. સ્વર્ગ અને નર્ક સિવાયની એક દુનિયાની કહાણી. કર્મની દુનિયાની કહાણી. ફિલ્મ જોયા બાદ જે મિત્રો સાથે ફિલ્મની વાર્તા શેર કરી તેઓને પણ ફિલ્મની વાર્તા સાંભળવી ગમી. ને તરત પ્રતિક્રિયા આપતા કે, તો તો જોવી પડશે ફિલ્મ. ચાલો એ બહાને પણ ગુજરાતી ફિલ્મ જોવા મિત્રો જશે એનો આનંદ થયો. ને જોઈને મિત્રો બહાર આવે પછી કહેતા કે, ફિલ્મનો ફર્સ્ટ હાફ તને ધીમો ન લાગ્યો ? ધીમેથી એમને હા, કહી દીધી એટલે ગુજરાતી ફિલ્મ જોવા ઓડિયન્સને પ્રોત્સાહન આપવાના પુણ્યના પાંચ પોઈન્ટ આપણાં ખાતામાં બેલેન્સ. ( અગેઈન,  પુણ્યના પોઈન્ટ.. શબ્દપ્રયોગ ફિલ્મ જેણે જોઈ નથી તેને નહી સમજાય !.. ફિલ્મના ફર્સ્ટ હાફમાં એકની એક વાત સમજાવવા પાંચ વાર પ્રયત્ન કરાયો છે તો અહી હુંયે એટલી છૂટ લઈ જ શકુ ને !.!.!.)  
બાકી આ ફિલ્મને રૂટિન વાર્તાઓના મારા વચ્ચે તેજસ પડિયાએ એક તાજ્જી.. નવી વાર્તા વાળી ગુજરાતી ફિલ્મ આપી.

અભિનય
રાજ અને યતિન... બંનેએ પોત-પોતાના કિરદારને ન્યાય આપ્યો છે. પદ્મેશ પંડિત બાબાના કિરદારમાં જામે છે. જગ્ગાભાઈ બનીને જોરદાર જમાવટ જમાવીને જલસા કરાવ્યા સુનિલ વિસરાણીએ. કિંજલ ક્યાંક ગમે, ક્યાંક કાચી પડે. બાકી સનત વ્યાસ પોતાના નાનકડા રોલમાં પણ પોતાની છાપ છોડી જાય. આ સિવાયના કિરદારોએ પણ પોત-પોતાના કિરદાર માટે કરેલી મહેનત અને તેમની પાસે દિગ્દર્શકે કઢાવેલું કામ પરદા પર દેખાય છે.
પણ હા, આ ફિલ્મથી ગુજરાતી ફિલ્મ ઈન્ડસ્ટ્રીને બે સારા અભિનેતા ચોક્કસ મળ્યા.

ગીત-સંગીત
વીજુ શાહે ગુજરાતી ફિલ્મમાં મ્યૂઝિક આપ્યું હોય તેવી આ પહેલી ફિલ્મ બની. ને સંગીતમાં તેમની છાંટ દેખાય છે.  બોલિવૂડના સિંગર અઝીઝે ગાયેલું ગીત ગમે તેવું છે. ટિપિકલ સંગીતથી હટીને થિરકવું ગમે તેવી ટ્યૂન સાંભળવા મળે એટલે યુવા પેઢીને ગમે.

દિગ્દર્શન
અનુભવ બંસલે આ ફિલ્મમાં સિનેમેટ્રોગ્રાફી કરી છે.  તેજસ પડિયાએ ફિલ્મના દિગ્દર્શનની સુકાન સંભાળી છે. પોતાના લેખક તરીકેના પાસા પર જો તેજસે દિગ્દર્શકનું પાસું હાવી કર્યુ હોત તો ડેફિનેટલી ફર્સ્ટ હાફ સ્લો જાય છે તેના બદલે તેજસ સારો કરી જ શક્યા હોત.

છેલ્લે.... એટલું તો ચોક્કસ લખીશ કે,
આ ફિલ્મ બનાવવાના કારણે વિજય ખત્રીના ખાતામાં ફિલ્મના કેટલા રૂપિયા જમા થશે એ હું નથી જાણતો, પણ હા, વિજય ખત્રીનો આ પ્રયત્ન થવાના કારણે, સારી ગુજરાતી ફિલ્મ બનવાના ચાલી રહેલા પ્રયત્નમાં તેમણે પોતાની ફિલ્મનો ઉમેરો ચોક્કસ કર્યો છે. જેના કારણે ગુજરાતી ભાષા માટે કંઈક નક્કર કરવાથી એ બાબતે તેમના કર્મના એકાઉન્ટમાં પુણ્યના પોઈન્ટનું બેલેન્સ ચોક્કસ વધશે. !

અલવિદા અભિનય સમ્રાટ

ફિલ્મી ફ્લેશબેક - 2014

2014માં કઈ કઈ ફિલ્મ્સ પરદા પર આવી, તેમાંથી કઈ ફિલ્મ હિટ રહી અને કઈ સુપરહિટ રહી. તેમજ કઈ ફિલ્મને બોક્સઓફિસ પર મળી જોરદાર પછડાટ એ જાણવા વાંચો ફિલ્મી ફ્લેશબેક -2014. 
આમ જુઓ તો 2014ના વર્ષની બ્લોકબસ્ટર માત્ર એક ફિલ્મ... બે યાર....ને ગણી શકાય. પણ આ સિવાય પણ કેટલીક એવી ફિલ્મ છે કે જેના પરદા પરના દેખાવ અને તેના મેકિંગ સહિતની બાબતોના કારણે 2014ના વર્ષની ફિલ્મ્સની જ્યારે પણ વાત નીકળે ત્યારે 21 જેટલી ફિલ્મને યાદ કરવી પડશે.  

 1. બે યાર 
100 દિવસ પૂરા થયા બાદ પણ થિયેટરમાં વખણાતી અને જોવાતી ફિલ્મ બે યાર માટે એમ કહેવાય કે, 2014ની દમદાર ફિલ્મ બે યાર જ રહી. ગુજરાતી ફિલ્મથી દુર ભાગતા દર્શકોએ પણ આ ફિલ્મને વખાણી અને માણી.

 2. આપણે તો ધીરુભાઈ 
ધીરુભાઈ અંબાણી બનવા માગતા એક ગુજરાતી યુવાનની મહત્વકાંક્ષાને પરદા પર બતાવતી ફિલ્મ આપણે તો ધીરુભાઈ હતી. વ્રજેશ હીરજી જેવા કલાકારના કારણ સિવાય આ ફિલ્મની હિન્દી રિમેક બનવાના સમાચારે ફિલ્મને ચર્ચામાં રાખી. આ જ કારણસર 2014ની નોંધપાત્ર ફિલ્મો જ્યારે પણ યાદ કરાય ત્યારે આ ફિલ્મ ચોક્કસ યાદ કરવી પડશે. 

  3. સાથિયો ચાલ્યો ખોડલધામ 
પટેલ સમાજના યાત્રાધામ એવા ખોડલધામને સાંકળતી ફિલ્મ સાથિયો ચાલ્યો ખોડલધામ કદાચ પટેલ સમાજના જ લોકોએ જોઈ હોત તો પણ કમાણી કરી જાત. એક હકીકત એ છે કે, ફિલ્મમાં લોકોને સમાજ અને ધાર્મિક આસ્થાની વાત નહી પણ એન્ટરટેઈનમેન્ટ જોઈએ છે .  સ્ટોરીલાઈન સિવાય આ ફિલ્મ મેકિંગમાં પણ માર ખાઈ ગઈ.  છતાં બોલિવૂડના કલાકારોના કારણે 2014ની ચર્ચાતી ફિલ્મમાં સાથિયો ચાલ્યો ખોડલધામનુ નામ ઉમેરાય છે.   

4. દેશબુક 
સરદાર.... રાષ્ટ્રનું એક એવું વ્યક્તિત્વ.. કે જે પરદા પર બહુ ઓછુ આવ્યું છે તેના વિચાર સાથે પરદા પર ફિલ્મ દેશબુક આવી. ફેસબુક..વાળી જનરેશનને... દેશબુક.. જોવી ગમે એવી ફિલ્મ ચોક્કસ હતી...

5. વ્હીસ્કી ઈઝ રિસ્કી 
સ્ટડી પ્રોજેક્ટમાં જ ગુજરાતી ફિલ્મ જ બનાવનાર ધવલ પટેલની ફિલ્મ.. વ્હીસ્કી ઈઝ રિસ્કી 2014ની યાદ રાખવી પડે તેવી ગુજરાતી ફિલ્મ ગણી શકાય. મેકિંગ.. સ્ટોરીલાઈન.. અને સંગીત સહિતના પાસાઓમાં ગુજરાતના યુથને વ્હીસ્કી ઈઝ રિસ્કી આકર્ષે તેવી ફિલ્મ બની રહી.
 

6. એક પ્રેમનો દિવાનો એક પ્રેમની દિવાની 
વર્ષની શરૂઆતમાં વિક્રમ ઠાકોરની ફિલ્મ એક પ્રેમનો દિવાનો... એક પ્રેમની દિવાની...  આવી હતી. 2014ની ચર્ચામાં રહેલી ફિલ્મોની યાદીમાં... આ ફિલ્મ વિક્રમ ઠાકોર અભિનીત ફિલ્મ હોવાના કારણે ચોક્કસ સ્થાન પામે. 
 

7. રસિયા તારી રાધા રોકાણી રણમાં 
કચ્છના મસ્ત લોકેશન્સ પર બનેલી... કંગાળ મેકિંગ અને એવી જ સ્ટોરી લાઈન વાળી ફિલ્મ રસિયા તારી રાધા રોકાણી રણમાં..  ગણી શકાય. આમ છતાં નવાઈની વાત એ છે કે, આ ફિલ્મે સારી કમાણી કરી હતી. માત્ર કમાણીના જ કારણોસર આ ફિલ્મની નોંધ 2014ની યાદ કરવી પડે તેવી ફિલ્મમાં લેવી પડે. બાકી.. રસિયા તારી રાધા રોકાણી રણમાં એક રૂટિન ફિલ્મ જેવી જ ફિલ્મ હતી. 
8. કોણ હલાવે લીમડી કોણ ઝુલાવે પીપળી 
આ વર્ષની વિક્રમ ઠાકોરની ત્રીજી અને છેલ્લી ફિલ્મ કોણ હલાવે લીમડી, કોણ ઝુલાવે પીપળી છે. પારિવારીક વાર્તા સાથેની આ ફિલ્મ પણ કમાણીના કારણે 2014ના વર્ષમાં પોતાની નોંધ છોડી ગઈ.
9. કળિયુગનો કાનો 
2014ની નોંધ લેવી પડે તેવી ફિલ્મમાં એક નામ કળિયુગનો કાનો ગણી શકાય. આ ફિલ્મની નોંધ લેવાનું પહેલું કારણ એ કે, ફિલ્મ રિલિઝ પહેલા બોલ્ડ પોસ્ટરના કારણે ચર્ચામાં આવી હતી. અને પરદા પર ફિલ્મ આવ્યા બાદ ફિલ્મના એક્શનસીન અને મેકિંગના કારણે દર્શકોએ ફરી ફિલ્મની ચર્ચા કરી. ફિલ્મના ગીત પણ દર્શકોને પસંદ આવે એવા બન્યા. ઓવરઓલ ફિલ્મ 2014ની નોંધપાત્ર ફિલ્મોની યાદીમાં સ્થાન મેળવનારી ફિલ્મ બની રહી. 

10. પ્રેમરોગ
જુદાં જ વિષયના કારણે પ્રેમરોગ એ 2014માં નોંધ લેવી પડે તેવી ફિલ્મ ગણાય. એક જ પ્રકારની પ્રેમ કહાણીઓ કરતા... કેટલાક એવા કિસ્સાઓ કે, જેના કારણે પ્રેમની ચર્ચાઓ ન્યૂઝમાં પણ થતી હોય છે.. એવા જ કિસ્સાઓમાંથી પ્રેરણા લઈ.. સમાજના સળગતા મુદ્દાને આ ફિલ્મ થકી પરદા પર લાવવામાં આવેલો....  અને મેકિંગ તેમજ કહાણીને લોકોએ સારો પ્રતિસાદ આપેલો... એટલે પ્રેમરોગ 2014ની એક નોંધપાત્ર ફિલ્મ બની ગઈ.
11. પડકાર 
હિતેન કુમાર.. અને રાકેશ બારોટ સાથે... શક્તિ કપૂર જેવા ચહેરાઓ ફિલ્મમાં... હોવા છતાં..  પરદા સુધી દર્શકોને ખેંચી લાવવામાં પડકાર ફિલ્મને પડકારનો સામનો કરવો પડેલો. બોક્ધાસઓફિસ પર આ ફિલ્મ સારી કમાણી ન કરી શકી. પણ હા... પડકાર..માં રહેલા મોટા ચહેરાઓના કારણે પડકાર એ  2014ની નોંધપાત્ર ફિલ્મ બની.
12. વિશ્વાસઘાત  
હિતુ કનોડિયાની ફિલ્મ... વિશ્વાસઘાત...ને પણ 2014ની સારી ફિલ્મોની યાદીમાં સામેલ કરવી પડે. મેકિંગ અને વાર્તા આ ફિલ્મના મજબૂત પાસા હતા. આ ફિલ્મના ગીત પણ મજ્જાના હતા... જેથી દર્શકોને આ પાસુ પણ દમદાર લાગ્યુ.
13. ઠાકોરના કોલ જગમાં અનમોલ 
વટ વચન અને વેર માટે ઠાકોર શું કરી શકે... એ સ્ટોરી લાઈન પર બનેલી ફિલ્મ... ઠાકોરના કોલ, જગમાં અનમોલ... આમ તો રૂટિન આવતી ફિલ્મ જેવી જ ફિલ્મ હતી... જો કે, 2014ની નોંધ લેવી પડે તેવી ફિલ્મમાં આ ફિલ્મનો સમાવેશ કરવો.. તે માટેનું સૌથી મોટું કારણ ધારાસભ્ય મધુ શ્રીવાસ્તવની ગુજરાતી ફિલ્મમાં એન્ટ્રી ગણી શકાય. 

14. પપ્પુ પાસ થઈ ગયો 
2014માં.. પરદા પર પપ્પુ પાસ થઈ ગયો ફિલ્મ આવી. પણ બોક્સઓફિસ પર આ ફિલ્મ પાસ ન થઈ.  કોમેડી અને બાળકો માટેની ફિલ્મ.,.. એ મુદ્દા પર આ ફિલ્મ આવી ત્યારે આ ફિલ્મને એટલીસ્ટ બાળકો પસંદ કરશે એવી આશા હતી... પરંતુ બાળકોએ આ ફિલ્મને ન જોઈને તેને કમાણીમાં ફેઈલ કરી. છતાં આ ફિલ્મની નોંધ લેવી પડે તે માટેનું સૌથી મોટું કારણ... સીઆઈડી ફેમ દયાની પહેલી વાર ગુજરાતી ફિલ્મમાં એન્ટ્રી ગણી શકાય. દયા સાથે આ ફિલ્મમાં રૂપાલી ગાંગુલી હતી. દયા હોય કે, રૂપાલી.... દર્શકોને તો ફિલ્મમાં પડવી જોઈએ મજા.. બાકી તો બોક્સઓફિસ પર ક્યારે ફિલ્મ આવે અને ક્યારે ઉતરી જાય... એની પણ જાણ રહેતી નથી.
15. કરમ કિસ્મત ને કુદરત 
જિત ઉપેન્દ્ર અને વૃંદા બ્રહ્મભટ્ટ..ની આ ફિલ્મના એવા કરમ.. કે કિસ્મત નહી હોય કે કુદરત તેને બ્લોક બસ્ટર બનાવી દે.... પણ આ ફિલ્મ માટે એમ ચોક્કસ કહેવાય કે, દિગ્દર્શક મનોજ  નથવાણી ફિલ્મ માટે કંઈક નવું કરી શક્યા.. એટલે 2014ની યાદ કરવી પડે તેવી ફિલ્મમાં 3Kનું નામ આવે છે. 

16. ધર્માત્મા 
ધર્માત્મા ફિલ્મ સાથે ડોન લૂકમાં પરદા પર જીત ઉપેન્દ્ર વર્ષના અંતમાં જોવા મળ્યા. વર્ષના અંત ભાગમાં આવેલી આ ફિલ્મ, જોરદાર કમાલ તો ન કરી શકી.. પણ હા, જીતનો લૂક અને એક્શન અવતાર દર્શકોને ચોક્કસ પસંદ આવે તેવો છે. એટલે જ 2014ની યાદ રાખી શકાય તેવી ફિલ્મમાં ધર્માત્માનું નામ આવે છે.
17. વાવ 
ઘણી બધી રાહ જોવરાવ્યા બાદ... વાવ.. ફિલ્મ પરદા પર આવી હતી. ને જેટલી ઝડપે આવી એટલી જ ઝડપે ઉતરી ગઇ. એવું હતું કે, જગદીશ ઠાકોર સાથે આનંદી અને કોમલની આ ફિલ્મ કમાલ કરી જશે. ખાસ તો ફિલ્મની સ્ટોરીના કારણે આવું કહેવાતું હતુ.. પણ ફિલ્મનો ધીમો ફર્સ્ટ હાફ દર્શકોને કંટાળો આપી ગયો.. ઓવરઓલ અસર ફિલ્મ પર પણ જોવા મળી.. જો કે, વાર્તાના કારણે આ ફિલ્મને ચોક્કસ 2014ની યાદ રાખવી પડે તેવી ફિલ્મમાં સ્થાન આપવું પડે. 

18. બજરંગલીલા 
બજરંગલીલા... પરદા પર ન કરી શકી લીલા. આ ફિલ્મ ધારી સફળતા ન મેળવી શકી. પણ હા.. આ ફિલ્મની સબ્જેક્ટ લાઈન રૂટિન ફિલ્મ કરતા ચોક્કસ અલગ હતી. એટલે જ ફિલ્મ.. બજરંગ લીલાને... 2014ની ફિલ્મમાં સ્થાન મળે છે.
19. નમો સૌને ગમો 
વર્ષના મધ્યાંતે ચૂંટણીના બરાબર જામેલા માહોલમાં પરદા પર આવી હતી નમો સૌને ગમો... પણ નમો સૌને ન ગમી... નરેન્દ્ર મોદીની ઓળખ સમાન નામ નમો. છે. એવું જ નામ અને કિરદારનો એવો જ લૂક... છતાં પણ મોદીની સતત વધતી લોકપ્રિયતાને એન્કેશ કરવાનો કિમીયો કારગત ન નિવડ્યો... ને આ ફિલ્મ કમાલ ન કરી શકી. નિષ્ફળતા છતાં ચર્ચામાં રહેવાને કારણે 2014ની નોંધનીય ફિલ્મોમાં સ્થાન મેળવી ગઈ નમો સૌને ગમો...
20. ઘર મારુ મંદિર  
ઘણાં સમય સુધી કોઈ ફિલ્મ ન આવવાને કારણે ચંદન રાઠોડને આ ફિલ્મ પર આશાઓ હતી. પણ આ ફિલ્મ પરદા પર ન જ ચાલી. ઘર મારુ મંદિર મોટી પબ્લિસિટી વિના આવી અને પરદા પરથી ઉતરી પણ ગઈ... પરિવારની વાત હોઈ પરદા પર લોકો સ્વીકારે જ એવી માન્યતા નથી ચાલતી એવું આ ફિલ્મના બેહાલ પરથી સાબિત થયું. 

21. લોહીનો નહી તો કોઈનો નહી..
હિતેન કુમાર અને જગદીશ ઠાકોર સ્ટારર ફિલ્મ લોહીનો નહી, તો કોઈનો નહી.. પણ પરદા પર દર્શકની ના થઈ શકી. અમુક જગ્યાએ દર્શકોએ પસંદ કરી.. બાકી ઓવરઓલ આ ફિલ્મ જોરદાર કમાલ ન કરી શકી... પણ હા.. હિતેન કુમાર અને જગદીશ જેવા નામના કારણે આ ફિલ્મની નોંધ લેવી પડે તેવી ફિલ્મ લોહીનો નહી તો કોઈનો નહી.. ગણી શકાય.

સાલ મુબારક...... બાદ સવાલ મુબારક........ ગુજરાતી ફિલ્મ ઈન્ડસ્ટ્રી માટે આ સાલ કેવી રહેશે ?

બે યાર... 

ગત વિક્રમસંવતની ગમે એવી ફિલ્મ.

ગુજરાતમાં રિલિઝ થઈ, હજુ ઘણાં થિયેટરોમાં ચાલી રહી છે અને વિદેશમાં પણ જોવાઈ અને વખણાઈ. 

એટલે એમ કહેવાય કે, ગુજરાત અને ગુજરાતીઓને આ ફિલ્મ મુબારક.  

દિગ્દર્શક અભિષેક જૈન એન્ડ ટીમને સવાયા સાલ મુબારક. 

આ સાલ મુબારક બાદ હવે એક સવાલ મુબારક

હવે સૌથી અઘરો અને આ વર્ષે સતાવતો સવાલ એ છે કે, ગુજરાતી ફિલ્મ ઈન્ડસ્ટ્રી માટે આ વર્ષ 'મુબારક' બનીને આવશે ? 

'કેવી રીતે..'ની ટીમ અમુક સમય બાદ 'બે યાર' લઈને આવે.. અને ફરી છવાઈ જાય. પણ એ વચ્ચેના ગાળાનું શું ? એ દરમિયાન પણ ગુજરાતી ફિલ્મમાં કંઈક નવું કરવાના પ્રયાસો થયા. જો કે, બોક્સઓફિસ પર એ નિષ્ફળ ગયા એ પણ કડવી વાસ્તવિકતા છે. કમાણી કરવા માત્રથી સફળતા નથી લેખાતી, વખણાવું એ પણ કમાણી જ છે. એવી કમાણી કરનારી ફિલ્મો પણ ઓછી આવી. ત્યારે હવે પછીનું શું.. ? 'બે યાર' જોઈને નીકળ્યા ત્યારે સાથે જોનાર ઓડિયન્સનો એક સૂર તો રહેતો હતો કે,  આવી ફિલ્મ આવે તો જોવી ગમે. તો એ ઓડિયન્સને રિપીટ ઓડિયન્સ બનાવે એવી કેટલી ફિલ્મ્સ આ વર્ષે આવશે ? 

આશા તો અમુક ફિલ્મ્સ પર છે, પણ નીવડ્યે વખાણ... 

બીજુ શું.. જોઈએ રાહ.... ને ગમે તો ચોક્કસ કહીશું વાહ..

સપ્તપદી : ગાજ્યા મેહ વરસ્યા નહી

             એબીકોર્પ ગુજરાતી ફિલ્મ લઈને આવે છે એવી વાત વહેતી થઈ ત્યારે શરૂઆતમાં માનવામાં નહોતુ આવ્યુ.. એટલે ખરાઈ કરી. વાતમાં તથ્ય જણાયુ. એટલે એ વખતે મે સ્ટોરી કરી કે ગુજરાતી ફિલ્મમાં એબીકોર્પનું આગમન.. બદલશે ગુજરાતી ફિલ્મોનું ભાવી ? એ વખતે મિશ્ર પ્રતિસાદ મળ્યો હતો. જે ગુજરાતી ફિલ્મ જગત સાથે ધરાતળથી જોડાયેલા છે તેઓએ કહ્યુ હતુ કે, એકાદ વખત ફિલ્મ આવશે, જો દર્શકો નહી મળે તો નુકસાની સ્વીકારી સાતત્ય નહી જાળવે અને ગુજરાતી ફિલ્મ જગત માટે એબીકોર્પે ફિલ્મ બનાવ્યાનો જશ જિંદગી આખી ખાતા રહેશે.. તો એક બહુ જ નાનો વર્ગ એવો પણ હતો કે, જેઓ એમ માનતા હતા કે, આ ફિલ્મ ગુજરાતી ફિલ્મની તાસીર અને તસવીર બદલશે ? એ નાના વર્ગની આ મોટી માન્યતા ખોટી પડી. એકાદ ફિલ્મથી આખી ઈન્ડસ્ટ્રીમાં બદલાવ આવી શકતો નથી. એ લાંબાગાળાની પ્રક્રિયા છે અને પ્રયોગો કરનારાઓ થાકશે નહી તો ધીમે ધીમે બદલાવ આવશે એ નક્કી છે. 

            આ ફિલ્મને લઈને બે રિવ્યુ વાચ્યા.. શિશિર રામાવતે પોતાની કોલમ અને બ્લોગ પર જે લેખ લખ્યો તે તમને આ લીંક પર ક્લીક કરવાથી વાંચવા મળી શકશે. http://shishir-ramavat.blogspot.in/2013/02/blog-post_2.html એક નવા પ્રયત્નને વધાવતા લખ્યુ કે "‘સપ્તપદી’ ભલે પરફેક્ટ ફિલ્મ નથી, પણ એની ક્ષતિઓને અવગણીને તેને માણી શકાય છે. તમે એક સરસ ફિલ્મ જોઈ, અને એ પણ આપણી પોતાની ભાષામાં, તે વાતનો ભરપૂર સંતોષ ‘સપ્તપદી’ જન્માવે છે."

        તો આ જ ફિલ્મ.. કે જેના સંવાદ કાજલ ઓઝા વૈદ્યે લખ્યા છે તેમણે પણ ફિલ્મ વિશે લેખ લખ્યો. તેની લીંક આ રહી. http://epaper.divyabhaskar.co.in/magazine/madhurima/56/05022013/0/1/

તેની ઈમેજ પણ મે facebook પર મુકેલી છે http://www.facebook.com/photo.php?fbid=579964928700215&set=a.143477835682262.22516.100000601381247&type=1&theater

     એક બીજાને ગમતા રહીએ - કોલમમાં કાજલ ઓઝા વૈદ્યનો લેખ ભલે ફિલ્મ સાથે જોડાયેલાઓને 'એક બીજા સાથે ન ગમતા રહીએ' જેવા મતલબનો લાગે.. પણ સાચુ તો સ્વીકારવું જ રહ્યુ... 

આ બંને લેખ તો તમે વાચી ચુક્યા છો.. હવે.. સપ્તપદી - આઠમુ વચનની આઠ અમુક એવી વાત  કે જે જાણવામાં તમને વાચક તરીકે રસ પડશે.. તે તમે વાચી શકશો ટૂંક સમયમાં મારા બ્લોગ પર...  બસ થોડા જ સમયમાં... Coming Soon

ગુજરાતી ફિલ્મ સારી નથી એમ હવે કેવી રીતે કહીશ.. !!

               ગુજરાતી ફિલ્મ્સ પ્રત્યે દર્શકોને સુગ છે, એ વાત ને ખોટી પાડે છે, નવી ગુજરાતી ફિલ્મ, કેવી રીતે જઈશ. આ ફિલ્મને મળી રહેલા પ્રતિસાદ બાદ એમ કહી શકાય કે જો દર્શકોને સારું અપાય તો એ ગુજરાતી ફિલ્મ જોવી પણ પસંદ કરે છે. અઠવાડિયા બાદ પણ આ ફિલ્મની ટિકીટ માટે દર્શકો પડાપડી કરે એ ગુજરાતી ફિલ્મ જગત માટે સારી શરૂઆતના શ્રી ગણેશ છે. 

વાર્તા
based on a true story
based on many true stories
ફિલ્મના અંતે આવતા આ બે વાક્ય ખરા અર્થમાં આ ફિલ્મની કહાણી છે. વિદેશ જવાની ઘેલછા ધરાવતા અનેક હરીશોને આ ફિલ્મ પોતાની કહાણી લાગશે ( હરીશ આ ફિલ્મ નો હીરો છે )  વિદેશ જવાના અધૂરા રહેલા સ્વપ્નાને બાપ, વાયા દીકરા સંતોષવાની ઈચ્છા રાખે, અને એ માટે જે જે કંઈ કરવા તૈયાર થાય છે, એ જ બાબતને પ્રશાંત પટેલ અને અનીશ શાહ દ્વારા આ ફિલ્મની કહાણીમાં બતાવવામાં આવી છે.
સંવાદ
રૂટીન લાઇફમાં બોલાતી રીતે જ બોલાયા છે ફિલ્મના સંવાદ.. એટલે સંવાદો ફિલ્મી લાગવાને બદલે પોતાના લાગે છે. ખાસ કરીને યંગસ્ટર્સને તો આ ફિલ્મના સંવાદો પોતાની સ્ટાઈલના જ લાગશે. ( બરાબરને બકા !! )
ગીત- સંગીત
ગીત અને સંગીત પણ છે અફલાતુન. આમ પણ રઈશ મનીયાર, જૈનીશ પંચાલ, વિવેક ટેલરની કલમનો જાદુ હોય  અને મેહુલ સુરતી તથા વિશ્વેશ પરમારનું સંગીત હોય એટલે 'વાહ' કીધા વિના કેવી રીતે રહીશ !!
અભિનય
વિદેશ જઈ મોટેલકિંગ બનવાના સપના રાખતો અને  'પેશન'થી ભર્યો ભર્યો હરીશ(સ!) હોય કે, એને પ્રેમ કરતી એનઆરઆઈ આયુષી, કે પછી બાકીના કોઈ પણ કિરદારને લઇ લો...  દરેક પાત્ર પોતાની ભૂમિકાને દમદાર રીતે નિભાવવામાં સફળ થયેલા પરદા પર દેખાય છે.
દિગ્દર્શન દિગ્દર્શનની બાબતે અભિષેક જૈન લઇ જાય છે ફૂલ ટૂ દાદ.. ફિલ્મનો સુકાની સારો તો ફિલ્મની નૈયા પાર થઇ જ સમજો. કેવી રીતે જઈશ..ની નાવને  અભિષેક જૈને સુપેરે પાર પાડી છે. મેકિંગની બાબતે ફિલ્મ સો ટકા ગમે તેવી છે.  અને ખાસ તો હું અમદાવાદીઓને કહીશ, અમદાવાદને આ ફિલ્મમાં જેટલું સારી રીતે બતાવ્યું છે, એટલું કોઈ ફિલ્મમાં નથી બતાવાયું. દરેક ફ્રેમ કંઈક ને કંઈક કહી જાય છે. અભિષેક સાથે સિનેમેટ્રોગ્રાફર પુશ્કરસિંહની પણ નોંધ લેવી જ પડે..
છેલ્લે.. છેલ્લે..
બેટર હાફ, મોહનના મન્કીઝ, ચાર, વીર હમીરજી આ દરેક ફિલ્મમાં નવું કરવાનો પ્રયાસ કરાયો. મલ્ટીપ્લેક્ષ ઓડીયન્સને ખેચવાનો પ્રયત્ન કરાયો.. એ ફિલ્મોએ નવું કર્યું હોવાની ચર્ચાઓ ઘણી થઇ પણ કેવી રીતે જઈશ જેટલો પ્રતિસાદના મળી શક્યો. છતાં નિરાશા વિના એ દરેક ફિલ્મના મેકર્સ દ્વારા નવું કરવાનો પ્રયત્ન થતો રહ્યો, અને એ પ્રયત્નના અંતે એક આવી સરસ મજાની ફિલ્મ મળી એનો આનંદ  છે.. હવે વધુ આવી થોડી ફિલ્મ્સ આવે તો ગુજરાતી ફિલ્મની દશા અને દિશા બદલાતા કોઈ નહિ રોકી શકે..   ગુજરાતી ફિલ્મ નથી સારી હોતી એમ કહેનાર અને ગુજરાતી ફિલ્મોમાં નવા પ્રયોગો ના ચાલે એમ કહેનારે આ ફિલ્મ અચૂક જોવી.. ફિલ્મ જોયા પછી કોઈ નહિ કહે કે, ગુજરાતી ફિલ્મ કેવી રીતે જોઇશ..  વેલડન, અભિષેક... હવે આપની ટીમ પાસેથી દર્શકોને રહેશે નવી ફિલ્મની રાહ...  

હિતુ મારશે હેટ્રિક ?

કાયદો ફિલ્મમાં ખાકી લૂકમાં હિતુએ રંગ જમાવ્યો છે. કાયદોમાં પૂનીત પરમારના કિરદારમાં દેખાયા બાદ હવે હિતુ ફરી એક વાર ખાકી લૂકમાં જોવા મળશે. આ વખતે હિતુના કિરદારનું નામ છે સૂરજસિંહ ચૌહાણ. સૂરજસિંહ ચૌહાણનું કિરદાર દર્શકોને ફિલ્મ પ્રીતને કાજે મે જગથી બાંધ્યા વેરમાં જોવા મળશે.  લાગે છે કે, કાયદોમાં દર્શકોએ હિતુને ખાકી લૂકમાં પસંદ કરવાને કારણે હિતુને પણ ખાકી લૂકનો જાણે ચસ્કો લાગ્યો છે.  એટલે જ વધુ એક ફિલ્મમાં હિતુએ આ પ્રકારના કિરદાર માટે હા કહી હોઈ શકે.  ઉલ્લેખનીય છે કે, નરેશ કનોડિયા પણ આ પહેલા ખાકી લૂકની હેટ્રિક મારી ચૂક્યા છે. દલડુ દીધુ મે કારતકના મેળામાં, રાજવીર અને કાયદો એમ એક પછી એક ત્રણ રિલિઝ થયેલી ફિલ્મમાં પોલીસ અધિકારીના કિરદારમાં દેખાઈને નરેશ કનોડિયાએ ખાકી લૂકની હેટ્રીક લગાવી હતી... ત્યારે હવે હિતુ પણ એક પછી એક આ બીજી ફિલ્મમાં ખાકી લૂકમાં તો છે જ... ત્યારે શું એ કોઈ વધુ એક ફિલ્મમાં આ પ્રકારનો જ રોલ સ્વીકારીને નરેશ કનોડિયાની જેમ હેટ્રિક લગાવશે કે કેમ ? તેવી ચર્ચા હિતુના ચાહકોમાં થઈ રહી છે.

પ્રીતને કાજે જગથી બાંધ્યા મે વેર નામની આ ફિલ્મમાં હિતુ સાથે કિરણ આચાર્ય જોડી જમાવશે. આ જોડી છેલ્લે રાજવીરમાં જોવા મળી હતી. તો સાથે જ આ ફિલ્મમાં રઝા મુરાદ અને ફિરોઝ ઈરાની સહિતના કલાકારો પણ જોવા મળશે. 

( સૌજન્ય : www.dhollywoodfilms.com )

કલાની કદર એ જ અવોર્ડ - સન્માન મેળવનાર સૌને અભિનંદન

        ટ્રાન્સમીડિયા ગુજરાતી સ્ક્રીન એન્ડ સ્ટેજ એવોર્ડ - 2011 સંપન્ન થવા સાથે સન્માનનો એક દાયકો પૂર્ણ થયો છે અને 11મો સન્માન સમારોહ પણ સંપન્ન થઈ ચૂક્યો છે. આ સમારોહમાં સન્માનિત થયેલા ગુજરાતી કલાકારોના નામ જાણવાની ઘેલછા ઘણાં બધા લોકોને હશે. પણ દરેક સુધી સન્માન મેળવી ચૂકેલા દરેક કલાકારના નામ નહી પહોચ્યા હોય. એવાં ચાહકો માટે મારા બ્લોગમાં આપી રહ્યો છુ. 

વિજેતા - નાટક ( ગુજરાત )

શ્રેષ્ઠ લેખક - નાટક ( ગુજરાત )
દિલીપ રાવલ - સંબંધ સાત જન્મના

શ્રેષ્ઠ સહાયક અભિનેત્રી - નાટક ( ગુજરાત )
પલક મહેતા - મારા સપનાનો રાજકુમાર

શ્રેષ્ઠ સહાયક અભિનેતા  - નાટક ( ગુજરાત )
રણધીરસિંહ - રમણ - ભમણ

શ્રેષ્ઠ અભિનેતા  - નાટક ( ગુજરાત )
મહેશ વૈદ્ય - ચાલો ૨૦-૨૦ રમીએ

શ્રેષ્ઠ અભિનેત્રી - નાટક ( ગુજરાત )
જૈમિની ત્રિવેદી - સંબંધ સાત જન્મના

શ્રેષ્ઠ દિગ્દર્શક - નાટક ( ગુજરાત )
વિપુલ શર્મા - સંબંધ સાત જન્મના

શ્રેષ્ઠ નાટક  -  ગુજરાત
સંબંધ સાત જન્મના
ફ્રેન્ડસ થિયેટર ગ્રુપ - ( વિપુલ શાહ / ચેતન ગાંધી )

શ્રેષ્ઠ લેખક - નાટક ( મુંબઈ )
મિહિર ભૂતા – સરદાર

શ્રેષ્ઠ દ્રશ્ય રચના – નાટક ( મુંબઈ )
છેલ પરેશ – સંકેત

શ્રેષ્ઠ પ્રકાશ રચના – નાટક ( મુંબઈ )
પ્રિતેશ સોઢા – કમલેશ મોતા – કોરટ

શ્રેષ્ઠ સંગીતકાર – નાટક ( મુંબઈ )
આલાપ દેસાઈ – મીરાં

શ્રેષ્ઠ હાસ્ય કલાકાર – નાટક ( મુંબઈ )
આશિષ ભટ્ટ – જીવવું તો વટથી જ

શ્રેષ્ઠ સહાયક અભિનેતા  - નાટક ( મુંબઈ )
પ્રેમ ગઢવી – 102 નોટ આઉટ

શ્રેષ્ઠ સહાયક અભિનેત્રી - નાટક ( મુંબઈ )
પલ્લવી પાઠક – દિકરો મારો લાજવાબ છે

શ્રેષ્ઠ અભિનેતા  - નાટક ( મુંબઈ )
પરેશ રાવલ – ડિયર ફાધર

શ્રેષ્ઠ અભિનેતા  - નાટક ( મુંબઈ )
વેદિશ ઝવેરી – સરદાર

શ્રેષ્ઠ અભિનેત્રી - નાટક ( મુંબઈ )
કેતકી દવે – અમરેલીથી અમેરિકા

શ્રેષ્ઠ દિગ્દર્શક - નાટક ( મુંબઈ )
દિનકર જાની – ડિયર ફાધર

શ્રેષ્ઠ નાટક  -  મુંબઈ
ડિયર ફાધર, આંગીકમ, સ્વરૂપ સંપટ

શ્રેષ્ઠ નાટક  -  મુંબઈ
સરદાર – અગમ પ્રોડક્ષન, હેમંત પિઠડિયા

વિજેતા - ફિલ્મ
શ્રેષ્ઠ કથા - ફિલ્મ
નૈતિક રાવલ - ચાર

શ્રેષ્ઠ પટકથા - ફિલ્મ
નૈતિક રાવલ - ચાર

શ્રેષ્ઠ સંવાદ - ફિલ્મ
કિશોર સચદેવ - તું જ મારી જિંદગી

શ્રેષ્ઠ કેમેરામેન  - ફિલ્મ
મનીષ વ્યાસ - ગોરી લઇ જઉં તને હું આજકાલમાં 

શ્રેષ્ઠ સંકલન  - ફિલ્મ
કનુ પ્રજાપતિ - રાજવીર - રહસ્યમય પ્રેમકથા

શ્રેષ્ઠ ગીતકાર  - ફિલ્મ
ડૉ. વિરંચી ત્રિવેદી - તું જ મારી જિંદગી

શ્રેષ્ઠ સંગીત દિગ્દર્શક  - ફિલ્મ
મૌલિક મહેતા / રાહુલ મુંજારિયા 
મન મોર બની થનગાટ કરે

શ્રેષ્ઠ ગાયક  - ફિલ્મ
દીપક જોશી - મન મોર બની થનગાટ કરે

શ્રેષ્ઠ ગાયિકા - ફિલ્મ
કીર્તન ભાગવત - તું જ મારી જિંદગી

શ્રેષ્ઠ નૃત્ય નિર્દેશક - ફિલ્મ
રાજુ નાયડુ - મન મોર બની થનગાટ કરે

શ્રેષ્ઠ સહાયક અભિનેતા  - ફિલ્મ
ફિરોઝ ઈરાની - પ્રાણ જાયે પણ પ્રિત ના જાયે

શ્રેષ્ઠ સહાયક અભિનેતા  - ક્રિટિક અવોર્ડ - ફિલ્મ
ભરત ઠક્કર -  મન મોર બની થનગાટ કરે

શ્રેષ્ઠ સહાયક અભિનેત્રી - ફિલ્મ
મીનલ કર્પે - હું પ્રેમી નંબર ૧

શ્રેષ્ઠ ખલનાયક - ફિલ્મ
ઈમ્તિયાઝ શેખ - પ્રાણ જાયે પણ પ્રિત ના જાયે

શ્રેષ્ઠ બાળ કલાકાર  - ફિલ્મ
દર્શન - તીર્થ
દલડું દીધું મેં કારતકના મેળામાં

શ્રેષ્ઠ બાળ કલાકાર  - ફિલ્મ
ધારા અમરેલીયા  - વહેલો આવજે મારા વીર

શ્રેષ્ઠ બાળ કલાકાર  - ફિલ્મ
નીરવ મહેતા - વહેલો આવજે મારા વીર

શ્રેષ્ઠ અભિનેતા  - ફિલ્મ
હિતેન કુમાર - ચાર

શ્રેષ્ઠ અભિનેતા  - ૧૦ વર્ષના સર્વોત્તમ અવોર્ડ વિજેતા
હિતુ કનોડિયા

શ્રેષ્ઠ અભિનેતા  - ક્રિટિક અવોર્ડ - ફિલ્મ
ચંદન રાઠોડ - પ્રાણ જાયે પણ પ્રિત ના જાયે

શ્રેષ્ઠ અભિનેત્રી  - ફિલ્મ
લાજવંતી - તું જ મારી જિંદગી

શ્રેષ્ઠ અભિનેત્રી  - ક્રિટિક અવોર્ડ - ફિલ્મ
કિરણ આચાર્ય - રાજવીર - રહસ્યમય પ્રેમકથા

શ્રેષ્ઠ દિગ્દર્શક  - ફિલ્મ
દિનેશ લાંબા - તું જ મારી જિંદગી

શ્રેષ્ઠ ફિલ્મ
ચાર - ખંજન ઠુંબર

વિજેતા – ટીવી સિરીયલ

શ્રેષ્ઠ સંગીતકાર ( શીર્ષક ગીત ) – ટીવી સિરીયલ

ઉદય મજમુદાર – નરસિંહ મહેતા

શ્રેષ્ઠ લેખક - ટીવી સિરીયલ

જિતેશ પટેલ – મોટી બા

શ્રેષ્ઠ સહાયક અભિનેત્રી - ટીવી સિરીયલ

ચિત્રા વ્યાસ – છુટાછેડા

શ્રેષ્ઠ સહાયક અભિનેતા - ટીવી સિરીયલ

રાગી જાની – મોટી બા

શ્રેષ્ઠ અભિનેતા - ટીવી સિરીયલ

માનસ શાહ – છુટા છેડા

શ્રેષ્ઠ અભિનેત્રી - ટીવી સિરીયલ

મોના થીબા – છુટા છેડા

શ્રેષ્ઠ દિગ્દર્શક - ટીવી સિરીયલ

સંદીપ પટેલ – મોટી બા

શ્રેષ્ઠ ટીવી સિરીયલ

છુટા છેડા – મીના ઘીવાલા પ્રોડક્ષન

વિજેતા – સ્પેશ્યલ અવોર્ડ

લાઈફ ટાઈમ અચિવમેન્ટ અવોર્ડ – પુરુષ

શ્રી હની છાયા

લાઈફ ટાઈમ અચિવમેન્ટ અવોર્ડ – સ્ત્રી

ઝંખના દેસાઈ

ધીરુભાઈ અંબાણી મેમોરિયલ અવોર્ડ

શ્રી ઉમંગભાઈ ઠક્કર ( ધર્મદેવ ઈન્ફ્રાસ્ટ્રક્ચર અને નીલકંઠ ગ્રુપ ઓફ હોટેલ્સ )

ટ્રાન્સમીડિયા વિશેષ અવોર્ડ

ટુરિઝમ કોર્પોરેશન ઓફ ગુજરાત લિમિટેડ

ખૂશ્બુ ગુજરાત કી ( બેસ્ટ એડવર્ટાઈઝિંગ કેમ્પેઈન )

મહારથી અવોર્ડ

શ્રી વિપુલ એ. શાહ ( હિન્દી ફિલ્મ દિગ્દર્શક – નિર્માતા )

ટ્રાન્સમીડિયા વિશેષ અવોર્ડ

શ્રી ધર્મેશ મહેતા

દિગ્દર્શક – નિર્માતા ( આર કે લક્ષ્મણ કી દુનિયા )

શ્રી મહેશ – નરેશ વિશેષ અવોર્ડ

શ્યામલ – સૌમિલ – આરતી મુન્શી ( ગાયક – સંગીતકાર )

ટ્રાન્સમીડિયા આલ્બમ અવોર્ડ

બોલ પુતર ગંગા ( જયકર ભોજક )

ટ્રાન્સમીડિયા પોપ્યુલર આલ્બમ અવોર્ડ

ભલા મોરી રામા ( અરવિંદ વેગડા )

ટ્રાન્સમીડિયા સરપ્રાઈઝ અવોર્ડ

ઈવેન્ટ ડાયરેક્ટર – ભરત જોષી

સન્માન મેળવનાર તમામ કલાકારને

અભિનંદન.... અભિનંદન..... અભિનંદન....