નેતા મધુ શ્રીવાસ્તવ બન્યા અભિનેતા : ઠાકોરના કોલ જગમાં અનમોલ : વિશેષ મુલાકાત - 2

નેતા મધુ શ્રીવાસ્તવ બન્યા અભિનેતા : ઠાકોરના કોલ જગમાં અનમોલ : વિશેષ મુલાકાત - 3

નહીં છોડું લવરબોયની ઈમેજ : ચંદન રાઠોડ

ચંદન રાઠોડ સાથેની ખાસ વાત સાંભળવા કરો એક ક્લીક..

'દેશbook' જોઈ આવ્યા કે નહી... ? Like કરવા જેવી ગુજરાતી ફિલ્મ

'દેશbook' 

       ટાઈટલ સાથે જ્યારે ફર્સ્ટ લૂક જોયો ત્યારથી આ ફિલ્મ જોવાની ઈચ્છા હતી. ને એ પૂરી પણ થઈ. ટાઈટલ પરથી હતુ કે ફિલ્મ કંઈક નવી વાત સાથે હશે.. ને છે પણ એવું જ. છેલ્લે ઘણી ફિલ્મ્સમાં એવું થયેલું કે ફિલ્મનો પ્રોમો જોયા પછી થિયેટર સુધી જઈએ ને ગયા પછી દાવ થઈ જાય.. અથવા તો એ િફિલ્મ વિશે ન લખીએ તો ફિલ્મ માટે સારુ એવું થાય એટલે લખવાનું ટાળું.. પણ આ ફિલ્મ જોયા બાદ તરત જ પહેલો વિચાર એ આવ્યો કે મારો બ્લોગ વાચતા મિત્રો સાથે આ ફિલ્મની વાત શેર કરુ. 

Like કરવા જેવી ગુજરાતી ફિલ્મ.. જાવ જોઈ આવો..

સરદાર સાથે અસરદાર ફિલ્મ.. એટલે દેશbook..

યુવાનો... સિસ્ટમ અને આજની વાત રજૂ કરતી ફિલ્મ એટલે દેશbook. 

અત્યારની ગુજરાતી ફિલ્મ્સ કરતાં સાવ જુદી પડતી ફિલ્મ એટલે દેશbook..

બે ચાર કલાક ફેસબુક પર ગાળી.. કોઈની વાહિયાત વાત Like કરવાને બદલે આ સરસ મજાની ફિલ્મ જોઈ આવો.. તો ગુજરાતી ફિલ્મને Like કરનારાઓમાં તમારો વધારો થશે. 

સ્ટોરી

      અત્યારે સૌથી વધુ ચર્ચામાં છે સરદાર. રાજનીતિના કારણે. દરેક પક્ષ સરદારને પોતાના ગણાવવાની હોડમાં છે, ત્યારે સરદાર એકેય પક્ષના નહી.. પણ દેશના છે. એવી જ કંઈક વાત સાથે આ ફિલ્મમાં દેખાય છે સરદાર.  ગાંધીજી એન્ડ ફેમિલી..  જુદાં જુદાં નાટક અને ફિલ્મના વિષય તરીકે પરદા પર અને તખ્તા પર જોવા મળી ચૂક્યા છે. પણ.. લોખંડી પૂરુષને સાવ સરળ રીતે, યુવાનો પચાવી શકે એ રીતે રજૂ કરાયા છે. હાલની સિસ્ટમમાં રહેલી ખોટ.. ખટકે તો છે સૌ કોઈને.. પણ એની સામે અવાજ ઉઠાવવા કોઈ તૈયાર નથી ત્યારે એવું યુવાનો કરે તેવી ઈચ્છા સાથે સરદાર આવે છે અને પછી જામે છે ફિલ્મ.. 

      સરદાર સિવાય વાત પ્રેમની.. એ બે પાત્ર વચ્ચેનો હોય કે પરિવારનો હોય... એ પાસાને પણ સારી રીતે સાંકળી લેવાયો છે આ ફિલ્મમાં. વિદેશ જવાની ઘેલછા, કે કોઈને પોતાના કરતા નીચા સમજવાનો સ્વભાવ..  આ બાબતને પણ સારી રીતે મુકાઈ છે વાર્તામાં. ટૂંકમાં તમને અત્યારની ફિલ્મ્સ કરતા સ્ટોરી નવી જ લાગવાની ગેરંટી.. 

સ્ક્રીન પ્લે

       સ્ક્રીન પ્લે માટે એમ જ કહેવું પડે કે... વાહ, વિપુલ શર્મા વાહ... 

       દર્શકોને પાત્ર સાથે જોડી રાખે... અને પાત્રને ખીલવનો પૂરો મોકો મળે એનું ધ્યાન રાખ્યુ છે તમે. યંગસ્ટર્સની અત્યારની શૈલી જોવા મળે છે સંવાદોમાં. સરદારના સંવાદો તો ભારેભરખમ હશે એવી પૂર્વધારણા હતી... પણ સરદાર સાથે યુથ કનેક્ટ થાય એ માટે ભારેભરખમ શબ્દોનો ભાર એમના પર નથી લદાયો એની મજા પડી. ઓવરઓલ.. સ્ક્રીનપ્લે સરસ છે. 

ગીત- સંગીત 

       લેટ્સ હેવ ફન બકા તુ...   વિનય દવે સારા લિરિક્સ અને યુથને ગમે તેવું  અભિષેક પટવારીએ આપેલું સંગીત. બોસ... ડાન્સફ્લોર પર ઝુમી ઉઠવાનું મન થાય તેવું કોમ્બીનેશન... મજા પડી...      

અભિનય

સરદારના કિરદારને જમાવ્યુ છે કલ્પેશ પટેલે. 

તુષાર પણ યુથને કનેક્ટ કરે છે. આજનો યુથ જીવતો હોય એમ પાત્રને જીવી બતાવ્યુ છે તુષારે. આ ફિલ્મથી ગુજરાતી ફિલ્મ ઈન્ડસ્ટ્રીને એક નવો ચહેરો મળ્યો. રંગભૂમિ સાથેનું જોડાણ દેખાય છે પરદા પર. 

અર્ચન ત્રિવેદી અને જૈમિની ત્રિવેદી બરાબર ખીલવ્યું છે તેમનું કેરેક્ટર.. સ્ક્રીન પર એ હોય એટલે દર્શકોની અપેક્ષા આમ પણ વધારે રહેવાની જ. ને એ અપેક્ષામાં તેઓ ખરા પણ ઉતર્યા છે. 

હરેશ ડાઘીયાએ ગોરધન ગોલ્ડન... અને જીતેન્દ્ર ઠક્કરે ભાઈજીના પાત્રમાં દર્શકોનું દિલ જીત્યું.

દિગ્દર્શન 

લવ ઈઝ બ્લાઈન્ડ જેણે પણ જોઈ હશે..તેઓ વિપુલ શર્માના નામને લઈને આ ફિલ્મ જોવા આવવાના જ. ને એ ફિલ્મના કારણે આ ફિલ્મમાં વિપુલ શર્મા પાસે અપેક્ષાઓ વધી જાય. ને ગુજરાતી ફિલ્મની બજેટ મર્યાદામાં એ અપેક્ષાઓ ફુલફિલ પણ થાય છે એનો આનંદ. 

ટૂંકમાં....

સારી ગુજરાતી ફિલ્મ નથી આવતી એવી ફરિયાદ દૂર કરનારી ફિલ્મ છે 'દેશbook'

એક અંગત વાત... 

         આ વાચ્યા પહેલાં જોનારામાંથીય કેટલાય અને વાંચ્યા પછી ફિલ્મ જોનારામાંથીય કેટલાય એવા હશે કે જે.. પહેલી પ્રતિક્રિયા એવી આપી દેશે કે, ''બોલિવૂડ જેવું નહી''  અલ્યા ભાઈ..  ગુજરાતી ફિલ્મના બજેટ પણ બોલિવૂડની ફિલ્મ જેવા નથી હોતા એવું નહી વિચારવાનું આ બોલતા પહેલા.. ? 

જો આપણી માનસિકતા આવી રહેશે અથવા તો આપણે માત્ર એમ કહ્યા કરશું કે.. "ગુજરાતી ફિલ્મ ઈન્ડસ્ટ્રી પતી જવાની અણી પર છે.."  અથવા તો "ગુજરાતી ફિલ્મ ઈન્ડસ્ટ્રી હવે લાંબુ નહી ખેંચે.."  તો ક્યાથી ખેંચે ? પહેલાં એવી ફરિયાદ કરતા હતા કે મલ્ટીપ્લેક્ષમાં ફિલ્મ આવે તો જોવા જઈએ... અને હવે આવે છે તો.. "ગુજરાતી ફિલ્મ તે કંઈ જોવાય... હીહીહી... " એમ કહી ફિલ્મ જોવાનું ટાળીએ.. તો ક્યાંથી નવું બનાવવાની હિંમત રહે ફિલ્મ મેકર્સમાં.. એના કરતા.. જુઓ એમણે કરેલા પ્રયાસને.. ગમે તો વખાણો.. ન ગમે તો ઝાટકી કાઢો.. બધી હિન્દી ફિલ્મ પણ હીટ નથી હોતી યાર.. ચેન્નઈ એક્સપ્રેસમાંય પડી જ ગ્યાંતા ને આપણા રૂપિયા.. શું કરી લીધુ? હજુયે ફરી શાહરૂખને જોવા જવાનાજ ને... ? એનો અમુક ટકા સપોર્ટ આપણી ઈન્ડસ્ટ્રી પણ ઝંખે છે. ગુજરાતી ફિલ્મ પ્રત્યે માત્ર સોગિયુ ડાચું.. અને અમુક ખરાબ ફિલ્મના કારણે બધી ફિલ્મ નહી જોવાની એવું તો કંઈ ચાલે... ગુજરાતી છીએ આપણે.. આપણી ભાષા તો જ બચશે...જો આપણી ભાષાની ફિલ્મ્સ બચશે...  આ જ ફિલ્મમાં સરદારના મુખે એક ડાયલોગ છે... "ગુજરાતી છે તું... અને હું એવું ઈચ્છુ છુ કે જ્યારે કોઈ ક્રાંતિની શરૂઆત થાય... ત્યારે લોક ચોક્કસ એમ કહે કે, નક્કી એ ક્રાંતિ કરનાર ગુજરાતી હશે." કંઈક આવી જ ક્રાંતિ આપણી ફિલ્મ ઈન્ડ્રસ્ટ્રીમાં પણ થવી જોઈએ.. અને એની શરૂઆત કરનારા ગુજરાતી દર્શકો જ હોવા જોઈએ.. ખરુ કે નહી.. ? તો ક્યારે જાવ છો.. 'દેશbook' જોવા.. ?

યાદ કરીએ 2013ની 13 ગુજરાતી ફિલ્મ

આમ તો વરસેદહાડે સાઈઠેક ફિલ્મની એવરેજ છેલ્લા અમુક વરસોથી જોવા મળી છે. આ વરસે પણ એ જળવાઈ રહી. જો કે, દરવખતની જેમ યાદ રહે એવી ફિલ્મો પણ આંગળીને વેઢે ગણી શકાય એટલી જ નીકળી ( આમ જુઓ તો આંગળીના વેઢા કરતા એક વધારે..! 13 ફિલ્મની વાત કરવી છે ને એટલે ..!)  આ બધી જ ફિલ્મોમાંથી મોટાભાગની કમાણીની બાબતે લાખના બાર હજાર કરનારી નીકળી... ને એમાં પાછુ નવુંયે કશું નહોતુ.. એટલે એની વાત કોરાણે મુકીએ. સાવ થોડી ફિલ્મ કમાણીની દૃષ્ટિએ સારી રહી. તો કેટલીક કમાણીમાં નિષ્ફળ રહી, પરંતુ ચર્ચામાં રહી. 

નવું કરવાનો પ્રયત્ન 

1) હેપ્પી ફેમિલી પ્રા. લિ. 

2013ના અંતમાં દર્શકોને હેપ્પી હેપ્પી કરવાના પ્રયાસરૂપે પરદા પર આવી હેપ્પી ફેમિલી. બહુ સારી ગુજરાતી ફિલ્મની અપેક્ષાવાળા અને ગુજરાતીના બજેટમાં હિન્દી ફિલ્મની અપેક્ષા રાખનારા 'ચીવટ'વાળા દર્શકો ચોક્કસ એમાંય વાંધોવચકો શોધે.. પણ સરવાળે સારુ કરવાનો પ્રયત્ન કર્યો એનો રાજીપો. દિગ્દર્શક રઘુવીર જોશી અને નિર્માતા આનદ દોશી સહિતની યંગબ્રિગેડ ગુજરાતી ફિલ્મ બનાવે... અને ગુજરાતી દર્શકો મલ્ટીપ્લેક્ષમાં ગુજરાતી ફિલ્મ જોવા આવશે એવી આશા રાખે એ જ તો સારી ગુજરાતી ફિલ્મ આવશે તેવી આશા અમર રાખવામાં આપણને મદદ કરે છે. 

2) ધ ગુડ રોડ 

બહુ ઓછા દર્શકોએ જોયેલી.. પણ બહુબધી ચર્ચાયેલી ફિલ્મ એટલે ધ ગુડ રોડ. 

ઓસ્કરમાં ગઈ અને ફેંકાઈ ગઈ એ આ ફિલ્મની બીજી ઓળખ. 

જો આ ફિલ્મે ઓસ્કરમાં એન્ટ્રી ન લીધી હોત તો મોટાભાગના ગુજરાતીઓને જાણ પણ ન થઈ હોત કે આ ફિલ્મ ક્યારે પરદા પર આવી અને ક્યારે ઉતરી ગઈ. પણ જેવી આ ફિલ્મની જાણ થઈ કે, ફિલ્મ જોયા વિના જ કેટલાય એચ.પી.( હરખપદુડા) ગુજરાતીઓ...  ગુજરાતી ફિલ્મો સારી બનવા લાગી છેની ચર્ચામાં લાગી ગયા.. તો આ ફિલ્મ જોઈ જ નહોતી તેવાય કેટલાય લોકો આ ફિલ્મના વિરોધમાં પણ મેદાને ઉતરી ગયા. 

એની વે.. ગુજરાતી ફિલ્મની ઓસ્કરમાં એન્ટ્રીનો હરખ... અને ફેંકાયાનો વસવસો. 

3) કોઈને કહેશો નહી 

ગે રીલેશનશીપ પર બનેલી બીજી ગુજરાતી ફિલ્મ ( આ પહેલા મેઘધનુષ્ય આવી હતી.. જો બીજી કોઈ આવી હોય તો જ્ઞાનમાં વધારો કરવા જણાવશો )

આ ફિલ્મના ગીતોમાં પ્રયોગ કરાયો. ગુજરાતી ઉપરાંત આ ફિલ્મમાં અંગ્રેજી અને સંસ્કૃત ગીતનો નવતર પ્રયોગ કરાયો. મેકિંગ પણ ગમે એવું હતુ. ઓવરઓલ.. ફિલ્મના નામ.. કોઈને કહેશો નહી..ને બદલે આવી પણ ફિલ્મ બની છે એમ કોઈ પણને કહેવાય યાર.. એ બહાને લોકો સુધી ગુજરાતી ફિલ્મની વાત પહોંચે અને ગુજરાતી ફિલ્મની ચર્ચા થાય. 

( તા.ક. મોટેભાગે આપણી ગુજરાતી ફિલ્મ્સ વાળા આમ પણ માઉથ પબ્લિસિટી પર ભરોસો રાખે છે, બાકી પૈસેથી કરાતી પબ્લિસિટીમાં અગેઈન બજેટ પ્રોબ્લેમ ! ) 

4) સપ્તપદી 

વરસની શરૂઆતમાં જ આવી હતી આ ફિલ્મ.. સપ્તપદી.. 

નામ વાંચીને તમને યાદ આવી ખરી ?

ના આવી. ? 

ક્યાંથી આવે.. ?

બહુ ઓછી પબ્લિસિટીનો ભોગ બની હતી આ ફિલ્મ પણ... મેકિંગ વખતે આ ફિલ્મ જેટલી ચર્ચાઈ એથી અનેક ગણી ચર્ચાઓ તેના રિલિઝ વખતે થવી જોઈતી હતી. આફ્ટરઓલ ગુજરાતના બ્રાન્ડ એમ્બેસેડર અને બોલિવૂડના શહેનશાહ અમિતાભ બચ્ચનની ફિલ્મ નિર્માણ કંપની એબીકોર્પ દ્વારા આ ફિલ્મ બનાવવામાં આવી હતી. વળી, સ્વરૂપ સંપત અને માનવ ગોહિલ જેવા અદભૂત અદાકારોએ તેમાં અભિનય કર્યો હતો. બિગ-બીએ પોતાની કંપનીની ફિલ્મ ગણીને..

 અમુકવાર બ્લોગ પર આનો ઉલ્લેખકર્યો હોત તોય દર્શકો થિયેટરમાં પહોંચીને ફિલ્મને સફળતા સુધી લઈ ગયા હોત. હશે..નસીબ ગુજરાતી ફિલ્મના.. બીજુ શું ?

બોક્સઓફિસ પર 'વિક્રમ'

                                              5) મા બાપના આશીર્વાદ 

પારિવારિક વાર્તા અને વિક્રમના ચાહકોને વખાણે તેવું મેકિંગ ધરાવતી ફિલ્મ, મા-બાપના આશીર્વાદ..ને કમાણીમાં દર્શકોના આશીર્વાદ મળ્યા. બોક્સઓફિસ પર ફિલ્મ ચાલે એ ગુજરાતી ફિલ્મના સારા ભવિષ્ય માટે આવશ્યક છે. હાલ જે દર્શકો સીંગલ સ્ક્રીનમાં ફિલ્મ જોવા જાય છે તે દર્શકોને આ ફિલ્મ પસંદ પડી. અને પરિણામે ફિલ્મ કમાણીની દૃષ્ટિએ પણ સફળ રહી. 

6) પાટણથી પાકિસ્તાન 

આ વર્ષમાં વિક્રમ માટે બીજી સફળતા એટલે પાટણથી પાકિસ્તાન. નામ પરથી જ નવો વિષય લાગતી આ ફિલ્મને દર્શકોએ એક્શનના કારણે પસંદ કરી.  

ચર્ચાંમાં ચૂંદડી અને બદલાની ભાવના - એવરેજ દેખાવ

7) મારા રાજ ઠાકોરની ચૂંદડી

જગદીશ ઠાકોર અને રેશ્મા પુરોહિત અભિનિત આ ફિલ્મને સિંગલ સ્ક્રીનના દર્શકોએ એવરેજ પ્રતિભાવ આપ્યો. આ ફિલ્મમાં ચરિત્ર અભિનેતા અને અભિનેત્રીના કિરદારમાં અરવિંદ રાઠોડ અને પદ્મારાણીએ ફરી એકવાર રંગ જમાવ્યો. વટ અને વેરની વાત સાથેની આ ફિલ્મને મિશ્રપ્રતિસાદ મળ્યો. 

8) ઠાકોરની લોહીભીની ચૂંદડી 

સુપરહિટ ફિલ્મ લોહીભીની ચૂંદડીની રિમેક એટલે ઠાકોરની લોહીભીની ચૂંદડી. આ ફિલ્મમાં હીરો બદલાયા, જો કે, દિગ્દર્શક સુભાષ શાહ જ હતા. મૂળ  ફિલ્મના અભિનેતાઓ સાથે આ ફિલ્મના અભિનેતાઓની સરખામણી ન કરીએ એ જ ઉત્તમ... કમાણીની દૃષ્ટિએ આ ફિલ્મ એવરેજ રહી હોવાનું કહેવાય છે. 

9)મારી પ્રીત કરે પોકાર 

કાયમ હીરો બને એ વિલન.. અને કાયમ વિલન બને એ હીરો બને.. એવું બન્યુ ગુજરાતી ફિલ્મ મારી પ્રીત કરે પોકારમાં. હિતેન કુમારે નવું કરવાના ભાગ રૂપે આ ફિલ્મમાં નેગેટિવ શેડ સ્વીકાર્યો અને પાર પાડ્યો. દર્શકોને આ ફિલ્મ પસંદ પડી હોત એવું કહેતા ફિલ્મની નજીકના વર્તુળો જણાવે છે કે, આ ફિલ્મ તારીખોના ચક્કરમાં અટવાણી એટલે ધારી એટલી દર્શકો સુધી ન પહોંચી શકી. 

10)સુહાગ

સ્ત્રી કેન્દ્રી અને બદલાની વાત સાથેની ફિલ્મ એટલે સુહાગ. રોમા માણેકે આ ફિલ્મમાં તવાયફનું કિરદાર નિભાવ્યુ. સૌરાષ્ટ્રના અમુક જ થિયેટરમાં રજૂ થઈ. બાકીના વિસ્તારના દર્શકોએ તો એ જોવાની જ બાકી છે.

ચર્ચાણી બહુ, વખણાઈ નહી

11)નામ છે મારુ ગંગા

અમિતાભ બચ્ચન ગુજરાતી ફિલ્મમાં.. આવી જ જાહેરાત સાથેની આ ફિલ્મના પોસ્ટર્સમાં બિગ-બી બહુ છવાયા. જ્યાં જુઓ ત્યાં નામ છે મારુ ગંગા.. એવા ગુજરાતી ટાઈટલ સાથેના પોસ્ટરમાં બચ્ચન અન્ય કલાકારો સાથે દેખાય. એ જોઈને કોઈ પણને થાય કે, બાપુ.. જલસો પડવાનો.. બિગ-બી આપણી ફિલ્મમાં... ને આ જ આશાઓ સાથે થિયેટરમાં જાવ.. એટલે છેતરાયાનો અહેસાસ થાય. ભોજપુરીમાંથી ઘણુ જ ખરાબ ગુજરાતી ડબ થયેલી આ ફિલ્મ જોયા બાદ એમ જ થાય કે, આપણી ગુજરાતી ફિલ્મોમાંય અમુક સારી બને છે, થિયેટરમાં ગયા પછી બહાર નીકળી જવાનું તો મન થયુ હતુ..પણ સહનશક્તિની પરીક્ષા કરવા અને ફિલ્મના દરેક ખરાબ પાસા નિહાળવા માટે આ લખનાર થિયેટરમાં બેસી રહેલો. 

12) હા હું દીકરીનો બાપ

ગુજરાતી ફિલ્મો પબ્લિસિટી પાછળ પૈસા નથી ખર્ચતી એવું મહેણું ભાંગનારી ફિલ્મ હતી.. હા.હું દીકરીનો બાપ. જો કે, એટલી પબ્લિસિટી છતાં સરવાળે દર્શકો થિયેટર સુધી ન પહોંચે એ આપણા કમનસીબ.!

                                                                               13) શક્તિ ધ પાવર 

શક્તિ ધ પાવર.. આ ફિલ્મનું ટ્રેલર જોયુ ત્યારે ફિલ્મને લઈને બહુ બધી આશાઓ બંધાણી હતી. જો કે, બધી આશાઓ ક્યાં પૂરી થાય છે એ ન્યાયે આ ફિલ્મ સારી હશે એ આશા.. ફિલ્મ જોયા બાદ નિરાશામાં પરીણમી. ફિલ્મમાં ગ્રાફિક્સનો આટલો ખરાબ ઉપયોગ કરશે એવી તો કલ્પનાય ક્યાંથી હોય. અમુક દ્રશ્યોને બાદ કરતા દર્શકો આ ફિલ્મની શક્તિનો સ્વીકાર કરે.. એટલો પાવર તો ફિલ્મમાં નહોતો જ.

સપ્તપદી : ગાજ્યા મેહ વરસ્યા નહી

             એબીકોર્પ ગુજરાતી ફિલ્મ લઈને આવે છે એવી વાત વહેતી થઈ ત્યારે શરૂઆતમાં માનવામાં નહોતુ આવ્યુ.. એટલે ખરાઈ કરી. વાતમાં તથ્ય જણાયુ. એટલે એ વખતે મે સ્ટોરી કરી કે ગુજરાતી ફિલ્મમાં એબીકોર્પનું આગમન.. બદલશે ગુજરાતી ફિલ્મોનું ભાવી ? એ વખતે મિશ્ર પ્રતિસાદ મળ્યો હતો. જે ગુજરાતી ફિલ્મ જગત સાથે ધરાતળથી જોડાયેલા છે તેઓએ કહ્યુ હતુ કે, એકાદ વખત ફિલ્મ આવશે, જો દર્શકો નહી મળે તો નુકસાની સ્વીકારી સાતત્ય નહી જાળવે અને ગુજરાતી ફિલ્મ જગત માટે એબીકોર્પે ફિલ્મ બનાવ્યાનો જશ જિંદગી આખી ખાતા રહેશે.. તો એક બહુ જ નાનો વર્ગ એવો પણ હતો કે, જેઓ એમ માનતા હતા કે, આ ફિલ્મ ગુજરાતી ફિલ્મની તાસીર અને તસવીર બદલશે ? એ નાના વર્ગની આ મોટી માન્યતા ખોટી પડી. એકાદ ફિલ્મથી આખી ઈન્ડસ્ટ્રીમાં બદલાવ આવી શકતો નથી. એ લાંબાગાળાની પ્રક્રિયા છે અને પ્રયોગો કરનારાઓ થાકશે નહી તો ધીમે ધીમે બદલાવ આવશે એ નક્કી છે. 

            આ ફિલ્મને લઈને બે રિવ્યુ વાચ્યા.. શિશિર રામાવતે પોતાની કોલમ અને બ્લોગ પર જે લેખ લખ્યો તે તમને આ લીંક પર ક્લીક કરવાથી વાંચવા મળી શકશે. http://shishir-ramavat.blogspot.in/2013/02/blog-post_2.html એક નવા પ્રયત્નને વધાવતા લખ્યુ કે "‘સપ્તપદી’ ભલે પરફેક્ટ ફિલ્મ નથી, પણ એની ક્ષતિઓને અવગણીને તેને માણી શકાય છે. તમે એક સરસ ફિલ્મ જોઈ, અને એ પણ આપણી પોતાની ભાષામાં, તે વાતનો ભરપૂર સંતોષ ‘સપ્તપદી’ જન્માવે છે."

        તો આ જ ફિલ્મ.. કે જેના સંવાદ કાજલ ઓઝા વૈદ્યે લખ્યા છે તેમણે પણ ફિલ્મ વિશે લેખ લખ્યો. તેની લીંક આ રહી. http://epaper.divyabhaskar.co.in/magazine/madhurima/56/05022013/0/1/

તેની ઈમેજ પણ મે facebook પર મુકેલી છે http://www.facebook.com/photo.php?fbid=579964928700215&set=a.143477835682262.22516.100000601381247&type=1&theater

     એક બીજાને ગમતા રહીએ - કોલમમાં કાજલ ઓઝા વૈદ્યનો લેખ ભલે ફિલ્મ સાથે જોડાયેલાઓને 'એક બીજા સાથે ન ગમતા રહીએ' જેવા મતલબનો લાગે.. પણ સાચુ તો સ્વીકારવું જ રહ્યુ... 

આ બંને લેખ તો તમે વાચી ચુક્યા છો.. હવે.. સપ્તપદી - આઠમુ વચનની આઠ અમુક એવી વાત  કે જે જાણવામાં તમને વાચક તરીકે રસ પડશે.. તે તમે વાચી શકશો ટૂંક સમયમાં મારા બ્લોગ પર...  બસ થોડા જ સમયમાં... Coming Soon

પ્રિય દોસ્તો... 

કેમ છો.. ?

આમ તો આ નાહકનો સવાલ છે, જો કે, હકનો'ય સવાલ તો કહેવાય જ આ... 

તમે ભલે મજામાં હો... પણ.. કેમ છો.. ? એમ તો પૂછવું જ રહ્યુ.. 

ખેર... સીધો મુદ્દાની વાત પર આવુ.... ઘણા સમયે આજે બ્લોગ પર લખવા બેઠો છુ... વાતો ઘણી ભેગી થઈ છે ગુજરાતી ફિલ્મ વિશે લખવાની.... કેટલાય નવા વિષયો મનમાં ચકરાવે ચડ્યા છે, એને શબ્દે બાંધીને આ બ્લોગ પર ઉતારીશ.. ત્યારે એ વિચારોને.. અને મને.. બેઉને.. હાશકારો થશે. 

પણ.. 

જરાંક મુશ્કેલી છે..

મારા વિષયો અને તમારી સાથેની વાતોને 'રાજકારણ' નડી રહ્યુ છે.

કારણ વગર હું લખતો નથી એવું નથી.. પણ કારણ કે... રાજકારણ છે.. એટલે અત્યારે લખવાનો વખત રહેતો નથી.. હવે તો બસ આ ચૂંટણી જાય.. ને પરિણામો આવે... ને બની જાય નવી સરકાર.. બસ પછી કોની દરકાર... નિરાંતે લખાશે... 

મને ગમતા... 

તમને ગમતા.. 

ગુજરાતી ફિલ્મોને પોતીકી માનતા તમામ ગુજરાતીઓને ગમતા વિષય પર મારા જ શબ્દોમાં જરૂર લખાશે.

પત્રકાર ખરો ને.. એટલે ચૂંટણી ટાણે એવા તો સમય મય થઈ જઈએ કે સમય જ ના રહે.. 

ગઈકાલે કોંગ્રેસના ઉમેદવારોની યાદી બહાર પડેલી,.. ને હજુ હમણાં જ ભાજપના ઉમેદવારોની યાદી બહાર પડી.. તોય તમને યાદી પાઠવવા હું આવ્યો છુ. 

ખેર... જલદી મળીશું..

જિતેન્દ્ર બાંધણિયા